湊仔妙語（7）- 洗手間奇遇記

估唔到，又係一個洗手間嘅故事。諗咗好耐，都係想同大家分享下：喺一個星期日，同埋兩個仔外出。細路仔行街要去洗手間，幾咁平常。通常佢哋去完，我都去埋，費事走嚟走去（尤其係當凈係得我一個人帶住佢哋個時）。而喺洗手間裡面，我會叫佢哋企喺牆邊，一嚟唔會阻住其他人，二嚟唔會比佢哋行嚟行去,齊到成身污漕邋遢。點知，個日係大清早，冇乜人，我諗以為ok，唔使下下都要管住佢哋，所以我冇落order叫佢哋靜靜地企埋一邊。好喇，當佢哋交差後，輪到我時（佢哋當時好奇怪地好靜咁喺我後面企埋一角），我亦集中精神，好快D交埋水費走人。正當我"辦理"手續時，突然有位金毛叔叔入嚟，睇佢入嚟個勢，就知係身手矯捷個D。佢一個箭步，已經就位，唔使一秒,堤壩崩裂,存水有若萬馬奔騰,又有如長江之水連綿不絕。雖然大家唔係要鬥快，但係我哋都想快D完成"繳費過程"。點知，我哋就嚟轉入直路終點在望時，忽然我兩個仔開始唱歌,重有咁大聲得咁大聲咁唱："有隻雀仔跌落水，跌落水，跌落水，有隻雀仔跌落水,被水沖去....." 我下意識地感覺到我隔離位金毛叔叔個D有如長江之水嘅氣勢，忽若小石墜入汪洋之中，盪然無全，一嚇之下，我感覺到呢個平平無奇嘅廁所突然充滿火藥味，我連望都唔咁望阿金叔叔變咗乜樣，當無事發生過，那那聲交埋D水費,洗手,左右手夾住兩隻馬騮即閃。

湊仔妙語（6）- 上廁所

我同我太太都非常慶幸兩個仔係返嚟香港冇耐，於老師威迫底下，終於完成父母其中一個偉大嘅使命 - 就係同佢哋戒片。 唔駛成日再買超貴嘅尿片（皆因我哋買親都要買三大袋，一個禮拜成幾百蚊）。好喇，可以自己去廁所，又有另一個問題，咪佢哋開始嫌廁所臭囉！忍唔住都唔肯去，賴都係咁話，連抱住佢去都唔得。最後，佢哋終於諗到個方法：我抱住佢哋之後，佢哋會 "um" 住自己塊面，然後唱 "ABC" 之類嘅英文歌。都行得通嘅，之不過有D廁所又真係好離譜，又濕又臭，連大人有得揀，都會避之則吉。其實，係廁所唱歌，咪重衰，佢哋唱鬼咁大聲，換氣都換幾次，分分鐘重吸多幾啖臭氣添。不過，佢哋都算有想像力，起碼可以自我麻醉，以為可以唱歌就唔駛聞臭氣。睇佢哋由廁所出嚟個樣，扯哂吓咁，人哋見到都唔知佢哋係入面做乜嚟。

湊仔妙語 (5) - 日全蝕

早幾日，剛剛遇上百年難得一見嘅日全蝕，香港呢度有日偏蝕睇。緊係唔可以帶兩個細路去睇，迫都迫爆，加上唔知去邊度睇，又未必有時間去睇，所以只可以係電視機度話俾佢哋聽乜野叫日偏蝕。我話俾個大仔聽時，佢突然開聲講： 哇，做乜事啊？雷公伯伯係咪過緊嚟啊？點解個太陽伯伯黑麻麻嘅？呢個係咪月亮嚟㗎？。。。 我諗，都要過一牌時間先可以話佢聽係乜嚟。

湊仔妙語（4）- 呼拉圈

某星期天，全家一齊去逛街，差不多三歲嘅兩位小朋友當然十分開心。雀躍心情，難以筆墨形容。基本上，所有事物不論是玩具或是成年人覺得毫不起眼嘅店舖佈置，佢哋一律唔會放過。玩完一輪呢度，再玩另一度。到後來，個大仔終於將視線放喺'呼拉圈'部，一面睇另外D小朋友點玩，一面自己去拎個返嚟玩。點知，佢拎咗個幾大嘅圈返嚟。三歲小朋友，點識玩嗌。所以，佢阿媽幫佢一把，扶起一邊圈。阿Felix 點知重醒，見人轉得咁開心，自己一定要快D轉。佢都未等阿媽幫佢手，自己已經開始轉- 轉喺轉，之不過佢喺自己tum tum 轉 （即係自轉），而唔係fing個圈嚟轉。睇到我同我太太，皆失聲大笑。

湊仔妙語（3）- 見人叫人

上個星期，成家去咗迪士尼樂園，玩完小小世界之後，到咗前面間雪糕店。兩個仔話一定要食雪糕，唉，冇計，行咗去買。但係我一定要佢哋自己同服務員哥哥姐姐講，要佢哋自己買。漂亮服務員姐姐，約廿十來歲，見到佢哋，即刻問佢哋......
服務員姐姐：你哋好嘛？係咪想食雪糕呢？叫聲我先啦？（佢好似好期待聽到一啲好嘅答案....）
MAX：（今次真喺諗咗好耐，大約3秒，終於開口講....） 姨姨.....
服務員姐姐： ？？？！！！！
本來企喺後面嘅兩位服務員哥哥：（已經滾地3圈笑死）

湊仔妙語（2）- 手錶故事

又有一日，個細仔又喊到口水鼻涕都噴晒出嚟，見到我隻手錶，話一定要囉嚟玩。其時，佢又黐住阿媽，攬到阿媽鬼死咁實。我就同佢講：
父：好，你唔好再喊，我俾你，但係淨係可以要一樣；咁你要媽媽定係要錶錶？
MAX：（用咗0.05秒諗一諗,之後答:） 我要媽媽隻錶錶父：XYZ???!!!!

湊仔妙語（1） - 錫晒你

有日下午，我同我細仔Max嘅妙問妙答：
父：唔好成日以為老豆大聲話你就唔錫你，其實阿爸好錫你㗎，你知唔知？
父：（好想個細仔聽明頭先自己講乜，所以即刻問返佢。。）
父：咁，MAX，你知唔知老豆錫晒邊個啊？
MAX：（低頭細聲道）爸爸錫媽媽囉...
父：（無言以對）....